Përurohet këndi i leximit në Fakultetin Juridik të Universitetit të Prishtinës “Hasan Prishtina”

Gjatë ditës së sotme u përurua Këndi i Leximit në Fakultetin Juridik, aktivitet ky i cili shënoi edhe fundin e projektit “Ndaje Dijen”.

Synimi i projektit „Ndaje Dijen” ishte krijimi i një këndi të leximit brenda hapësirës së Fakultetit Juridik të Universitetit të Prishtinës “Hasan Prishtina”, e cila do të shfrytëzohet nga studentët për rivitalizimin e jetës studentore.

Ky kënd tashmë është realizuar dhe do të përdoret nga studentët e Universitetit si pikënisje për lindjen e forumeve të reja studentore të cilat do të adresojnë çështje të ndryshme universitare që lidhen me arsimin e lartë, integritetin akademik, nxitjen e vetëdijes kritike, rrjetëzimin e studentëve të Universitetit të Prishtinës, ngjalljen e jetës studentore etj.

Ajo që i ka shtuar vlerën projektit është punimi i kokërrshilteve nga të miturit në Qendrën Korrektuese për të Mitur në Komunën e Lipjanit, përmes bashkëpunimit me Innovation Hub Lipjan.

Poashtu Këndi është i pajisur me rreth 400 tituj të fushave të ndryshme, ku studentët mund të lexojnë gjatë qëndrimit në hapësirën e këndit.

Projekti “Ndaje Dijen” u mbështet nga Organizata për Rritjen e Cilësisë në Arsim, ndërsa u implementua nga Klubi i Etikës i Fakultetit Juridik në bashkëpunim me Zyrën e Dekanit të Fakultetit Juridik